Xustificación e obxectivos da actividade

O que tentamos facer con esta actividade é mostrar a música desde diferentes puntos de vista e, tamén, as súas posibles aplicacións en distintos ámbitos de traballo ou mesmo de lecer. A música ten, dende sempre, unha importancia social e cultural, pero tamén sensorial e mesmo corporal. É moi diferente a súa aplicación nos diferentes eidos: cine, literatura, educación... pero en todos eles a une un denominador común: é transmisora de sensacións, ideas, imaxes...

A característica máis innovadora da actividade é que lles permitirá aos asistentes achegarse á música e ás súas características desde diferentes puntos de vista e, ademais, terá unha elevada carga práctica que permitirá interactuar, practicar, aprender e gozar, así como comprender o noso pasado para aprender de cara ó futuro.

Ademais, contarase con dous obradoiros: un deles está relacionado co coñecemento e coidado da voz, da modulación e o son galego, aprendendo tanto técnicas de canto como a falar sen forzar o noso aparello fonador. Por outro lado está o obradoiro de percusión para traballar a coordinación, o ritmo e para coñecer os diferentes instrumentos percutivos que se empregaron na nosa terra ó longo do tempo como puideron ser, en moitas ocasións, os aparellos de labranza.